أخت المرحوم نمر محيسن الراجودي ترثيه بقصيدة حزينة
والله لـولا الله والثــــانيـة عيـــب
قــدام خلــق الله لاصيــح وابكيــه
وألطــم على خدي واشقق الجيـــب
وأقـــول مـافيـكي ياعيــن هاتيــه
واسيح فالدنيـا واسرح مـع الذيــب
واضـوي مـع البوم داخــل مخـابيـه
عليــك ياستـر البْنــي الرعـابيـــب
الطيـب والمرجـله كلها بينه فيــــه
خزام اللكيع اللي جنب الخير تجنيـب
صليب شـور وما ينثنــي عن مباديـه
الله من هــمٍ ذوب القلــب تذويـــب
مريت على البيت وما شفت راعيـــه
ياقلــب ياللي بين الضلوع المحاديـب
راح اللي ربيعـك شوفتـه وطـاريــه
ياوجد قلبــي وجد عودٍ لفَّـه الشيـب
مـاغيـر ملكـاده على الدرب تقـديـه
ولا خـلــوجٍ ابعـدوهـا بالمشاعيــب
وجـروا ولـدها للذبـح وهي تراعيـه
ولا كسيـر السـاق بيـن المصاويـب
دمـه نزف ومـاحـولـه مـن ينـاديـه
يانفـس عافـي صافيـات المشاريـب
وياعيـن هلّـي عليــه الدمـع هلّيــه
يفــدوه الرخوم إمتركين المواجيــب
العفون اللي ماتلحق وجوهم مواطيه
غبـر الوجــوه مشذبيـن العـراقيــب
من يومهم مايلحقوا نصيفة مماشيـه
أودعتــك الله علام مـا كان فالغيــب
ربٍ رحـوم وهـذا هو هقـونـا فيــه
ليست هناك تعليقات :
إرسال تعليق